Илгирлар ҳақида

Ассалому алайкум, ҳурматли Шайх Ҳазратлари. Сизга бермоқчи бўлган саволим ҳозирги кунда жуда долзарб ҳисобланган мавзулардан бири бўлган иссиқ-совуқ амаллар ва уларни олиб ташлаётган (ёки олиб ташлаяпман, деб кўрсатаётган) одамлар тўғрисида.

Тақдир тақозоси билан Янгийўл шаҳридан унча узоқда бўлмаган шаҳарчалардан бирига борган эдим. У атрофларда ўзларини «илгир» деб атовчи бир нечта одамлар яшар экан. Шундай одамлардан бирининг ҳузурига бориб қолдим. У менинг бошимни, белимни, кўкрагимни ушлаб кўрди-да, «Ичинг иссиқ-совуқ амалларга тўлиб кетибди», деди ва бармоқларини оғзимдан томоғимгача тиқиб, бирин-кетин мазкур иссиқ-совуқ амалларни ола бошлади (улар илгирнинг бармоқларига ёпишиб чиқди). Шу тариқа илгир хола ичимдан саккиз дона амал олди ва «ичингда ҳали бунақа амаллар жуда кўп, менинг олдимга тўрт-беш кун қатнайсан», деди. Бир дона амални олишнинг нархи минг сўм экан. Ичимдан олинган амаллар нўхат катталигидаги ипдан тўқилган тугунлардан иборат эди ва уларни албатта оқаётган дарёга улоқтириш лозим эмиш. Илгирнинг тушунтириб беришига кўра, улар ҳар хил мақсадда қилинган экан: бахтсиз бўлишга, касал бўлишга, ишдан кетишга ва хоказо. Улар олиб ташланган тақдирда ҳам янги ой чиққандан кейин амалларни одам ичига олиб келиб ташлаган жинлар уларни бошқатдан яна олиб келиб ташлашар экан ва шу тариқа ҳар ой бу илгирга келиб, уларни олдириш лозим бўлар экан. Мендан ташқари, бу илгирнинг ҳузурида амал олдириш учун келган ҳар хил ёшдаги яна чамаси қирқ-элликта одам бор эди.

Саволимиз шундай: Ўзларини илгир деб атаётган одамлар ҳақиқатда ҳам одамларнинг ичидан иссиқ-совуқ амалларни ола биладиларми? Уларнинг олдига бориб, хизматидан фойдаланиш жоизми? Ёки улар қилаётган иш кўзбўямачилик йўли билан одамлардан пул ундиришми (тахминан ҳисоблаб кўрсам, у ерда камида қирқ киши бор экан. Илгир уларнинг ҳар биридан ўрта ҳисобда беш донадан амал олса, икки юз дона амал олар экан. Ҳар бир олинган амал эса минг сўм, шунда ҳаммаси бўлиб ўрта ҳисобда кунига икки юз минг сўм бўлади. Ундан ташқари, йигирма дона тухум олиб борсангиз, илгир ичингизга камроқ амал тушиши учун бу тухумларга қирқ минг сўм эвазига дам солиб берар экан.

Жавобингиз учун олдиндан катта раҳмат айтиб қоламан.