«Мусулмон кишини сўкиш фисқдир. У билан урушиш эса куфрдир»
Ассалому алайкум, Шайx ҳазратлари! Анчадан бери бу саволга жавоб тополмай юрибман. Биз биламизки, мусулмон мусулмонга қўл кўтариши, уриши куфр ҳисобланади, мумкин эмас. Мен коллеж талабасиман ва ҳеч кимга сир эмаски, бизнинг ёшимиздаги йигитлар орасида турли сабабларга кўра уруш-жанжаллар бўлиб туради. Кўп ҳолларда Пайғамбаримиз Муҳаммад соллаллоҳу алайҳи васалламнинг ҳадисларига амал қилиб, ғазабни ютиб, булардан узоқроқда бўлишга ҳаракат қиламиз. Аммо баъзан ўша жанжал қилишни истаганлар шунақанги ҳолатга олиб келишадики, уришмасдан иложи йўқ (ўзи шунга мажбур қилади). Агар уришмаса, қўрқоқ экан деб, ҳар доим шу ишини қилаверади, ҳатто пул ҳам сўрашади.
Саволим шуки, мана шу каби иложи бўлмай қолган ҳолларда уришиш мумкинми? Агар уришсак, гуноҳкор бўламизми? Сизга бу саволимни xолис беряпман, илтимос. Тўғри йўл кўрсатинг, токи биз гуноҳкор бўлиб қолмайлик.
Бисмиллаҳир Роҳманир Роҳийм.
- Ва алайкум ассалом!
عَنْ عَبْدِ اللهِ بْنِ مَسْعُودٍ رَضِيَ اللهُ عَنْهُ قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ: «سِبَابُ الْمُسْلِمِ فُسُوقٌ، وَقِتَالُهُ كُفْرٌ». رَوَاهُ الْبُخَارِيُّ وَمُسْلِمٌ وَالتِّرْمِذِيُّ وَالنَّسَائِيُّ وَغَيْرُهُمْ.
Имом Бухорий, Имом Муслим, Имом Термизий, Имом Насоий ва бошқа машҳур муҳаддислар Абдуллоҳ ибн Масъуддан ривоят қилган машҳур ҳадисда Набиййимиз Муҳаммад соллаллоҳу алайҳи васаллам: «Мусулмон кишини сўкиш фисқдир. У билан урушиш эса куфрдир», деганлар.
Маълумки, фосиқлик катта гуноҳ ҳисобланади. Шариат кўрсатган чегарадан чиқиб, гуноҳ ишларни қилувчилар фосиқ ҳисобланади. Фисқ диндан чиқишнинг бошланиши бўлиб, тавба қилмасдан, ўша гуноҳни давом эттирганлар диндан чиқади. Шунинг учун ҳам ҳадиси шарифда сўкиш фисқ, уруш эса куфр, дейиляпти. Чунки фисқ куфрга олиб борганидек, сўкиш ҳам урушга олиб боради.
Сабр қилсангиз, ажр оласиз. Одамларнинг гапи билан бирор ерингиз камайиб қолмайди.
Валлоҳу аълам.
Дин ишлари бўйича қўмитанинг хулосаси рақами: 2022 йил 03-07/1077
