Таомхоналардаги ортиб қолган таомни ташлаб юбориш керакми?

Ассалому алайкум ва раҳматуллоҳи ва барокатуҳ.

Бизга Исломни ҳидоят йўли қилиб берган Аллоҳга битмас-туганмас ҳамдлар бўлсин ва Саййидимиз Муҳаммад соллаллоҳу алайҳи васалламга беадад салоту саломлар бўлсин. Қадрли Устоз, сизга ҳозирда биз рўбарў келаётган бир муаммо бўйича савол бермоқчи бўлиб турибмиз. Агар беодоблик ёки такрорланиш содир бўлган бўлса, бизни афв этасиз, деган умиддамиз. Саволимиз қуйидагича:

Ҳозирда биз чет элда бир ўзбек одамнинг ошхонасини юрғизиб, савдо қилиб турибмиз, алҳамдулиллаҳ. Харидорлар ва истеъмолчиларимиз ҳам чет эл фуқаролари, яъни турли хил миллат эгалари. Таом сотиш жараёнида кўпгина харидорлар таомланиб бўлганларидан сўнг баъзида бир киши тўядиган ёки бўлмаса исроф бўладиган даражада таомлар ортиб қолади. Албатта, биз истеъмолчиларни огоҳлантириб, охиригача, яъни шариат талаб қилганича таомларни исроф қилмасликка чақирамиз ва эслатамиз. Аммо шунга қарамасдан, кўп ҳолларда таомларнинг исроф бўлишига сабаб бўладилар.

Шундай ҳолатларда биз ҳам ушбу ортиб қолган таомни ташлаб юбориш керакми ёки уни ўзимиз тановул қилиб қўйишимиз керакми, деб, нима қилишни билмай, иккиланиб қоляпмиз. Чунки у таом бир истеъмолчининг моли эвазига сотиб олинган ва унинг ризқидир. Агар биз тановул қилсак, у ҳолда ўша истеъмолчининг молини ботил йўл билан еган бўлмаймизми?

Камбағал ёки мискинларга берайлик десак, атрофимизда таомга зор одамлар деярли йўқ.

Шу сабаб бу ишимизга ойдинлик киритиб берсангиз, деган мақсадда сизга мурожаат қилаётган эдик. Илтимос, шариат талаб қилган йўлни бизга етказиб берсангиз.

Жавобингиз учун олдиндан раҳмат. Аллоҳ барчамизни икки дунёда азиз ва мукаррам қилсин!