"Ҳадис ва Ҳаёт" китобларида эса "Эй бор Худоё" жумласи ишлатилган.
Ассалому алайкум, ҳурматли Шайх ҳазратлари!
1. Тафсири Ҳилол китоби 6-жузида "Тангри, Худо, Парвардигор" каби сўзлар Аллоҳ таолонинг исмлари бўлмаганлиги учун қўлланилмаган. "Ҳадис ва Ҳаёт" китобларида эса "Эй бор Худоё" жумласи ишлатилган. Савол: Бу жумла нима учун ишлатилган?
2. Маълумки, жин одамлар кўзидан тўсилган, яъни у инсонларга кўринмайди. «Ҳадис ва Ҳаёт» китобининг 6-жузи, 64-бетида бир ҳадисдан олинган фойдада «одамлар жинни кўриши мумкинлиги» деб ёзилган. Савол: Нима учун «одамлар жинни кўриши мумкинлиги» деб ёзилган?
3. Шариатда қориларга инсон танасидаги жинни оят ўқиб, у билан гаплашиб, у(жин)ни чиқаришига рухсат борми?
1. Эски ўзбек тилида борлиги учун. Худо сўзи форсча бўлиб, Аллоҳ лафзи Жалоласи маъносини ифода қилади. Ҳозирда мазкур лафзни ишлатмай қўйганмиз.
2. Бирор матнни, хусусан, ҳадиси шарифни ўқиганда диққат билан ўқиш керак. Агар сиз мазкур жумладан олдин келтирилган ҳадисни диққат билан ўқиганингизда, Набий алаҳиссаломнинг «Ҳаммангиз эрталаб туриб, унга назар солишингиз учун уни масжиднинг устунларидан бирига боғлаб қўймоқчи бўлдим» деган гапларини ҳам ўқиган бўлар эдингиз. Бундан баъзи ҳолатларда жинлар одамларга кўринишлари мумкинлиги келиб чиқади. Жинлар баъзида ўзининг асл яратилган ҳолатида эмас, балки илон ва бошқа шаклларда одамларга кўриниши маълум ва машҳур.
3. Олдин жавоб берилган.
Валлоҳу аълам.
Дин ишлари бўйича қўмитанинг хулосаси рақами: 2022 йил 03-07/1077
