Мўмина аёл жаннатда дунёдаги эри (жаннатий бўлса) билан бўлиши

Бисмиллаҳир Роҳманир Роҳийм.

- Ва алайкум ассалом! Оятларда у дунёдаги эркакларга бериладиган неъматлар ҳақида сўз кетганда, албатта, аёллар ҳам назарда тутиладилар. Улар ҳам мазкур неъматларга эришадилар. Фақат ҳурлар ҳақида сўз кетганда «Аёлларга-чи, уларга нима бўлади?» деган савол туғилади. Бу саволга Муҳаммад алайҳиссаломнинг ҳадисларидан жавоб топамиз.

Машҳур муҳаддислардан Абул Қосим Табароний ривоят қилган узун ҳадисда жумладан шундай дейилади:

عَنْ أُمِّ سَلَمَةَ قَالَتْ: قُلْتُ: يَا رَسُولَ اللهِ، أَخْبِرْنِي عَنْ قَوْلِهِ «عُرُبًا أَتْرَابًا» قَالَ: «هُنَّ اللَّوَاتِي قُبِضْنَ فِي دَارِ الدُّنْيَا عَجَائِزَ رَمْضَاءَ شَمْطَاءَ، خَلَقَهُنَّ اللهَ بَعْدَ الْكِبَرِ فَجَعَلَهُنَّ عَذَارَى عُرُبًا مُتَعَشِّقَاتٍ مُحَبَّبَاتٍ أَتْرَابًا عَلى مِيلَادٍ وَاحِدٍ»، قُلْتُ: يَا رَسُولَ اللهِ، أَنِسَاءُ الدُّنْيَا أَفْضَلُ أَمِ الْحُورُ الْعِينِ؟ قَالَ: «بَلْ نِسَاءُ الدُّنْيَا أَفْضَلُ مِنَ الْحُورِ الِعِينِ كَفَضْلِ الظِّهَارَةِ عَلَى الْبِطَانَةِ»، قُلْتُ: يَا رَسُولَ اللهِ، وَبِمَا ذَاكَ؟ قَالَ: «بِصَلَاتِهِنَّ وَصِيَامِهِنَّ وَعِبَادَتِهِنَّ اللهَ، أَلْبَسَ اللهُ وُجُوهَهُنَّ النُّورَ، وَأَجْسَادَهُنَّ الْحَرِيرَ، بِيضُ الْأَلْوَانِ، خُضْرُ الثِّيَابِ، صَفْرَاءُ الْحُلِيِّ، مَجَامِرُهُنَّ الدُّرُّ، وَأَمْشَاطُهُنَّ الذَّهَبُ، يَقُلْنَ: أَلَا نَحْنُ الْخَالِدَاتُ فَلَا نَمُوتُ أَبَدًا، وَنَحْنُ النَّاعِمَاتُ فَلَا نَبْؤُسُ أَبَدًا، وَنَحْنُ الْمُقِيمَاتُ فَلَا نَظْعَنُ أَبَدًا، أَلَا وَنَحْنُ الرَّاضِيَاتُ فَلَا نَسْخَطُ أَبَدًا، طُوبَى لِمَنْ كُنَّا لَهُ وَكَانَ لَنَا»، قُلْتُ: يَا رَسُولَ اللهِ، الْمَرْأَةُ مِنَّا تَتَزَوَّجُ زَوْجَيْنِ وَالثَّلَاثَةَ وَالْأَرْبَعَةَ، ثُمَّ تَمُوتُ فَتَدْخُلُ الْجَنَّةَ وَيَدْخُلُونَ مَعَهَا، مَنْ يَكُونُ زَوْجُهَا؟ قَالَ: «يَا أُمَّ سَلَمَةَ، إِنَّهَا تُخَّيَّرُ فَتَخْتَارُ أَحْسَنَهُمْ خُلُقًا، فَتَقُولُ: أَيْ رَبِّ، إِنَّ هَذَا كَانَ أَحْسَنُهُمْ مَعِي خُلُقًا فِي دَارِ الدُّنْيَا فَزَوِّجْنِيهِ، يَا أُمَّ سَلَمَةَ، ذَهَبَ حُسْنُ الْخُلُقِ بِخَيْرِ الدُّنْيَا وَالْآخِرَةَ». رَوَاهُ الطَّبَرَانِيُّ.

«Умму Салама шундай деди:

«Эй Аллоҳнинг Расули, Аллоҳнинг «ъурубан атробаа» деган ояти ҳақида гапириб беринг», дедим. Ул зот: «Улар бу дунёдан қариб, сочи оқариб, кўримсиз бўлиб кетган кампирлар бўлиб, уларни қиёматда Аллоҳ таоло тенгқур, бокира, эҳтиросли, маҳбуба қизлар қилиб қайта яратади», дедилар. «Эй Аллоҳнинг Расули, бу дунёнинг аёллари афзалми, ҳури ийнларми?» дедим. Ул зот: «Эй Умму Салама, бу дунёнинг аёллари ҳури ийнлардан устки кийим ичкийимдан афзаллиги каби афзалдир», дедилар. «Эй Аллоҳнинг Расули, нималари билан?» дедим. Ул зот: «Намозлари, рўзалари, Аллоҳга ибодатлари билан. Аллоҳ уларнинг юзларига нур, таналарига ипак кийдирган. Ранглари оппоқ, кийимлари яшил, зебу зийнатлари сариқ, исириқдонлари дурдан, тароқлари тилладан. Улар: «Бизлар мангумиз, ҳеч қачон ўлмаймиз, неъматларга бурканганмиз, ҳеч қачон мухтож бўлмаймиз, бир жойда яшаймиз, ҳеч қачон кўчмаймиз, розимиз, ҳеч қачон аччиқланмаймиз. Биз (жаннатда) кимники бўлсак, ким бизники бўлса, яшасин», дейдилар», дедилар. «Эй Аллоҳнинг Расули, бу ерда баъзи аёллар икки, уч, тўрт эрга тегадилар, кейин вафот қилиб, жаннатга киради. Улар ҳам у билан жаннатга кирсалар, аёл қайси эри билан бўлади?» дедим. Ул зот: «Эй Умму Салама, у аёлнинг ихтиёрига қўйилади. Эрларнинг ичида энг хулқи яхшисини танлайди: «Аллоҳим, мана бу дунёда менга яхши хулқли бўлган эди, мени шунга бергин», дейди. Эй Умму Салама, яхши хулқ икки дунёнинг яхшилигига эриштиради», дедилар».

Валлоҳу аълам.

Дин ишлари бўйича қўмитанинг хулосаси рақами: 2022 йил 03-07/1077