Шом намозининг охирги вақти
Шайх ҳазратлари, Аллоҳ сизга баракали умр ва яхши оқибат берсин. Баъзилар намоз вақтига ҳаддан ташқари қаттиқ туришади. Хусусан, шом намозини 10-15 дақиқа билан чегаралашади ва шунча вақт ўтиши билан бирор сабаб туфайли аввалги вақти ўтган шом намозини умуман ўқишмайди, балки хуфтондан кейин қазо қилиб ўқишади. Умуман, шом намозини узрли ҳолатда кечиктириб қўйган киши тахминан қанча вақт давомида адо сифатида ўқиб олса бўлади?
Бисмиллаҳир Роҳманир Роҳийм.
Бу ҳақда барча фиқҳ китобларида айтилган.
Шомники ундан то шафақ ғойиб бўлгунча. У қизғишликдир ва бунга фатво берилгандир.
عَنْعَبْدِ اللهِ بْنِ عَمْرٍو رَضِيَ اللهُ عَنْهُ، أَنَّ رَسُولَ اللهِ صَلَّى اللهُ عَلَيْهِ وَسَلَّمَقَالَ: «...وَوَقْتُ صَلَاةِ الْمَغْرِبِ مَا لَمْ يَغِبِ الشَّفَقُ...». رَوَاهُ مُسْلِمٌ
Имом Муслим Абдуллоҳ ибн Амр розияллоҳу анҳумодан қилган ривоятда Расулуллоҳ соллаллоҳу алайҳи васаллам: «Модомики шафақ ғойиб бўлмаса, шомнинг вақти бор», деганлар.
Термизий Ибн Аббос розияллоҳу анҳумодан ривоят қилган, Жаброил алайҳиссалом Набий соллаллоҳу алайҳи васалламга намознинг вақтларини кўрсатиб берган ҳадисда у зот:
«...ثُمَّ صَلَّى الْمَغْرِبَ حِينَ وَجَبَتِ الشَّمْسُ وَأَفْطَرَ الصَّائِمُ، ثُمَّ صَلَّى الْعِشَاءَ حِينَ غَابَ الشَّفَقُ...». رَوَاهُ التِّرْمِذِيُّ عَنِ ابْنِ عَبَّاسٍ رَضِيَ اللهُ عَنْهُ.
«Сўнгра шомни қуёш ботиб, рўзадор ифтор қиладиган пайтда ўқиди. Сўнгра хуфтонни шафақ ғойиб бўлганда ўқиди», деганлар. Демак, шом намозининг вақти ушбу икки вақт орасида бўлади.
Яна ҳам қўпол қилиб айтиладиган бўлса, бизда қуёш ботгандан кейин эллик дақиқа ўтгунча, яъни хуфтоннинг вақти киргунча шомнинг вақти туради. Қуёш ботгач, ўн беш дақиқадан кейин уни ўқимай қўйганлар ўзини катта гуноҳга урган бўладилар.
Валлоҳу аълам.
Дин ишлари бўйича қўмитанинг хулосаси рақами: 2022 йил 03-07/1077
