Қурбонлик одоблари ҳақида
Ассалому алайкум, Шайх ҳазратлари! Қуйидаги ҳолатга аниқлик киритишга ёрдам берсангиз.
Умму Салама розияллоҳу анҳодан ривоят қилинади: «Набий соллаллоҳу алайҳи васаллам: «Кимнинг сўядиган қурбонлиги бўлса, зулҳижжанинг ойи кўрингандан бошлаб, то қурбонлик қилгунича, сочидан ҳам, тирноғидан ҳам ҳеч нарсани олмасин», дедилар». Бешовларидан фақат Бухорий ривоят қилмаган.
Ушбу ҳадисга мувофиқ, қурбонлик қилмоқчи бўлган одам кечаги кун аср намозидан бошлаб, соч, соқол, тирноқларини олмаслиги керакми? Бу амалларнинг бажарилиши қурбонликнинг қабул бўлишига қай даражада аҳамиятли? Жавоб учун олдиндан раҳмат.
- Ва алайкум ассалом! Булар савобли ишлардан ҳисобланади. Ушбу ҳадисга амал қилган одам савоб олади. Унга амал қилмаган одамга ҳеч нарса бўлмайди.
Аммо бу дунёда қилган ҳар бир амалингизга гувоҳ бўлиб турган фаришталардан ташқари, ҳар бир аъзоингиз ҳам сизга қарши ёки фойдангизга гувоҳлик берадиган қиёмат кунида ушбу ҳадисга амал қилганингиз учун хурсанд бўласиз, иншааллоҳ.
Валлоҳу аълам.
Дин ишлари бўйича қўмитанинг хулосаси рақами: 2022 йил 03-07/1077
