«Яхшилик қилмайман», деб қасам ичиш мусулмон одамга тўғри келмайди.

Бисмиллаҳир Роҳманир Роҳийм.

Албатта, «Яхшилик қилмайман», деб қасам ичиш мусулмон одамга тўғри келмайди. Бу ҳақда Аллоҳ таоло Бақара сурасида оят нозил қилган:

وَلَا تَجْعَلُوا اللَّهَ عُرْضَةً لِّأَيْمَانِكُمْ أَن تَبَرُّوا وَتَتَّقُوا وَتُصْلِحُوا بَيْنَ النَّاسِ وَاللَّهُ سَمِيعٌ عَلِيمٌ

«Ичган қасамларингиз сабабли яхшилик қилиш, тақво қилиш ва одамлар орасини ислоҳ этишингизга Аллоҳни тўсиқ қилманг. Аллоҳ эшитувчидир, билувчидир» (224-оят).

Ушбу оятнинг тафсирида Абдуллоҳ ибн Аббос розияллоҳу анҳу ва бошқа азизлар: «Қасамингни яхшилик қилишингга тўсиқ қилма, қасамингнинг каффоратини бергин-да, яхшилик қилавер», деганлар.

عَنْ أَبِي هُرَيْرَةَ، قَالَ: قَالَ رَسُولُ اللهِ صَلَّى اللهُ عَلَيْهِ وَسَلَّمَ: «مَنْ حَلَفَ عَلَى يَمِينٍ، فَرَأَى غَيْرَهَا خَيْرًا مِنْهَا، فَلْيَأْتِ الَّذِي هُوَ خَيْرٌ، وَلْيُكَفِّرْ عَنْ يَمِينِهِ». رَوَاهُ مُسْلِمٌ

Имом Муслим Абу Ҳурайра розияллоҳу анҳудан ривоят қилган ҳадиси шарифда Расулуллоҳ соллаллоҳу алайҳи васаллам: «Ким қасам ичса ва қасам ичган нарсасидан яхшироқ ишни кўрса, қасамига каффорат бериб, яхши ишни қилаверсин», деганлар.

Баъзилар «Фалон ишни қилмайман», деб қасам ичиб қўяди. Кейин «Бу савобли ишни нимага қилмаяпсан?» дейилса, «Қасам ичганман», деб баҳона қилади. Бу оятда мана шу масалага ойдинлик киритилмоқда.

Аслини олганда, қасам ичиш яхши иш эмас. Жиддий, ўзини билган одам керак ишни қасам ичмай ҳам қилаверади. Мабодо қасам ичиш лозим бўлиб қолса ҳам, бу қасам яхшиликнинг амалга ошиши учун бўлиши керак. Аммо Аллоҳ таолонинг номи билан қасам ичишни яхшилик, тақво ва одамлар орасини ислоҳ этиш каби эзгуликларга тўсиқ қилиб олиш мутлақо дуруст эмас.

Валлоҳу аълам.

Дин ишлари бўйича қўмитанинг хулосаси рақами: 2022 йил 03-07/1077